本文重點
籌備多時嘅同齡同心慶鑽禧慈善籌款晚宴尋晚在君悅酒店盛大舉行，晚宴以七十年代做主題，所以卓妮都梳咗個高髻去捧場，點知到場見到一眾同齡同心成員真係嚇一驚，個個打扮匠心獨運，創意十足。好似「媽打」李麗娟整咗個七十年代奧米茄髮型，莎莎老闆郭少明就變「阿飛」，教育局局長孫明揚太太鍾小芬仲激，戴個爆炸頭，仲好搞笑話自己剛去完屯門睇煙花。
郭少明阿飛Look全場驚嘆
尋晚個宴會可謂星光熠熠，前財爺梁錦松、兩代民政事務話事人「藍爺」藍鴻震及林煥光都有捧場，仲有久違了嘅前駐京辦主任梁寶榮就偕太太一齊到場。無見寶官咁耐，原來佢已經四代同堂，兩年前榮升外公，雖然變阿公，但寶官唔認老，話現時幫緊新世界中國地產做地區主管，負責天津項目。早排梁展文過檔新世界單嘢搞到㷫合合，寶官就申報自己○八年入職嗰陣已經做足晒手續。
卓妮同場仲見到「小吉」方黃吉雯，佢揀咗件綠色通花旗袍再襯個古董手袋，佢仲教路做女人一定要保持心境開朗及多做善事，咁就一定會靚靚，連美顏針都慳番唔使打。至於郭少明個「阿飛正傳」Look，令全場驚嘆，連郭太都大讚老公好似返番去三十年前追佢嗰陣咁嘅樣。
同齡同心多名六十歲成員之中，以十二月出生嘅譚耀宗年紀最小，佢當晚宴係為自己慶祝，所以全家總動員嚟晒捧場，聲勢浩大。另外，同齡同心成員之一嘅「卡樂Ｂ之父」戴德豐，由於現時身在北京，所以尋晚無到，但仍派出囡囡戴凱欣去撐場，認真畀面。
卓妮