由經濟動力立法會議員林健鋒、梁君彥同梁劉柔芬搞嘅「金融海嘯的反思」研討會，尋日喺港大舉行，頭炮請嚟Peter做講者。港大學生發展總監莊陳有都現身捧場，佢到場後就埋去同Peter打招呼。莊陳有失明，未必知道Peter個樣係點，但佢都笑稱聽聞過Peter有「銀行界梁朝偉」嘅外號。

Peter講笑話如果佢真係梁朝偉就唔使做銀行界，可以收山啦！究竟影帝同銀行家邊個身家豐厚啲，Peter真係要認真計過條數至好。

講番個研討會，Peter對住幾百名嘉賓同學生，暢談對海嘯一周年嘅睇法，又塞錢落學生袋，提醒佢哋記住教育嘅重要性，否則難以面對瞬息萬變嘅社會，佢又認為，取得個人成就後一定要幫人。