鄉議局籌建新大樓進行得如火如荼，商界大孖沙都已紛紛慷慨科水，反而該局廿七個鄉事委員會就仲未交數，又未搞籌款活動催谷善款，令主席劉皇發同一眾高層相當着急。發叔以前試過扯火叫班鄉紳飲水思源，話有權利就有義務，可惜班鄉紳聽唔入耳，所以發叔打算聯同兩位副主席，於下月中親自落鄉「收數」。
鄉議局執委會尋日匯報新大樓籌款進展，話籌款工作成果差強人意，仲建議外聘籌款公司協助籌款工作。睇番大孖沙嘅捐款，連同上月新世界發展董事總經理鄭家純捐出嘅五百萬元，已籌得逾七千萬元，而海外鄉紳就總共捐出九百萬元，夾埋佔咗大半工程費，好明顯「差強人意」四隻字係衝着廿七個鄉委會。
局方當初嘅如意算盤，係希望每個鄉可以籌到二百萬元，廿七個鄉共有五千四百萬元，但聽聞現在只得大埔鄉事委員會超額交出六百萬元，其他鄉就未見影，或者已經開定支票等發叔去收都未定。