下屆特首選舉三年後先舉行，但三次試圖參選特首嘅巴士阿叔陳乙東尋日就發表咗參選宣言同政綱，宣布重出江湖，仲專針住煲呔曾施政弱點落重藥。喺煲呔曾仲頭痛緊點搞禁毒時，阿叔提出政府要用市價百分之十嘅價錢，買晒毒販嘅毒品，再派番畀吸毒嘅市民，實行享用毒品非刑事化嘅同時宣傳埋禁毒。
阿叔嘅瘋狂建議仲包括解放煙禁，即係唔再禁煙嘞。並成立另類社團管理局嚟管理黑社會，其他政綱仲包括將香港變做「明珠股」上市，再分番股票畀市民，咁就係真正嘅還富於民喎，佢又認為應解散醫管局，改由民間組織做監管醫院嘅工作。睇阿叔嘅政綱，足以證明佢創意力十足，不過要得民心似乎唔係咁容易嘞。
○六年喺巴士上以一句「有壓力、未解決」而成名嘅巴士阿叔，回歸前已經開始想問鼎特首寶座，但就一直都未能成功提名。阿叔係咪可以做到下屆特首候選人就無人知，但肯定嘅係，佢係最早敢承認參選嘅「稱聲特首參選人」。