比賽由街工梁耀忠、「I.T.豪」譚偉豪、英姐三位立法會議員，各拍藝人，分組一較高下。阿忠同歌星薛凱琪好合拍，逢答必中，相反英姐尋日大失水準，好似大會問連續幾多日嘅工傷假期需要向勞工處呈報，正確答案係三日，但佢答係七日。

大會又考英姐為受傷工友進行急救嘅步驟，本來，英姐今年二月喺立法會大樓嘅樓梯差錯腳跌傷，被急救送院，有過深刻經驗，英姐要答呢條問題應該易過食生菜，但係英姐照樣答錯，佢仲唔服氣上訴，話當日佢跌落樓梯受傷，立法會同僚係先為佢急救，然後先至打電話將佢送院喎。不過，就算英姐辯才再好，大會始終以官方答案為準，佢最終都係要認輸。