拔萃男書院為咗慶祝建校一百四十周年，特別同由校友王守業做主席嘅大新銀行合作，推出以男拔做主題嘅白金卡。身兼男拔校董會主席嘅自由黨立法會議員張宇人尋日出席有關宣傳活動時就話，雖然佢依家已經一屋信用卡，多到袋都袋唔晒，但為咗支持母校，都一定會申請番張。
肥仔張又話，自己六九年喺美國讀大學一年班時，已獲發人生第一張信用卡，當時啲銀行嘅發卡準則比依家嚴好多。佢仲記得頭一年佢張卡嘅最高簽帳額為一百美元，喺當年嚟講絕對唔係小數目，隔一年仲倍增至二百美元，證明有關銀行對佢好有信心。
本身都係男拔校友嘅男拔校長張灼祥表示，估計有過萬名校友、學生家長同教職員合資格申請該張信用卡，但未夠十八歲嘅學生就冇份，唔擔心會教壞啲學生過度消費。原來林子祥係張校長嘅同學，佢踢爆林讀書時好怕醜，同學都唔知佢原來係唱家班，反而當年又唱詩歌班，又拉小提琴同大提琴嘅張校長，畢業後就同音樂無緣喇。