香港大學呢輪真係當黑，由大學管理層至學生都有人涉及刑事案件，仲鑊鑊新鮮鑊鑊甘，前醫學院長林兆鑫、教育學院外籍副教授以至文學院學生同一日畀法庭判刑，又行為不當又非禮又偷嘢，話晒港大係龍頭大學，學生都係天之驕子，搞出咁多醜聞，真係無眼睇！
唔少港大校友叫校長徐立之做番啲嘢，保住港大百年老店呢個金漆招牌，但幾日嚟校方無咩聲氣，直到尋日凌晨三點，徐校長突然以港大校訓「明德格物」為題，寫咗封午夜電郵畀學生、教職員同校友，主動提到呢幾單案，仲話自己嘅心情同大家一樣咁沉重，令佢反思港大嘅使命。
徐校長語重心長話，港大立校以來，社會一直好有期待、信任同尊敬，對港大嚴格監督，其實係反映公眾對港大嘅熱切期望，所以港大必須繼續努力，以優越學術素質同研究貢獻，報答社會期望，所有港大人更加唔可以忘記，港大嘅成功，都在於崇高嘅道德同誠信。佢話港大當前任重而道遠，又要發展新課程、起新校舍以及喺學術領域衝刺，仲要喺關鍵時刻互相警醒，秉持大學應有嘅核心價值。
其實「樹大有枯枝」，都無得話怪邊個，但今次搞成咁，校長都有好大壓力，否則唔會夜麻麻寫電郵穩定民心啦！