事發喺旺角通菜街，傍晚接近六點左右，一名男子突然攞出一樽腐蝕性液體潑向一男一女。好衰唔衰，誤中副車，另外九名途人無辜遇害，有人臉部灼傷，有人手腳刺痛。呢宗殃及池魚嘅潑鏹案搞到咁多人受傷，旺角再一次成為「鏹戰世界」。

功夫茶推測，潑鏹動機不外乎兩個可能，一係為錢，一係為情。具體詳情梗係交畀警方調查啦，等佢哋挽回少少面子吖嘛。雖然話今次唔係高空轟炸啫，如無意外同以前幾單案件無關，不過事發地點始終係旺角擲鏹重災區，當地廣布天眼，便衣不計其數，有人居然唔識死膽敢老虎頭上動土，警方應該覺得好瘀皮。打個譬喻吖，如果家陣有人敢去嚴密布防嘅烏魯木齊發動恐怖襲擊，當地武警一定面目無光。

話時話，旺角第一次出現擲鏹狂徒係舊年十二月，事隔五個月之後再整多劑，時至今日前前後後九個月嘞，警方查來查去查到乜東東呢？好似乜都冇喎，仍然茫無頭緒。咁就唔止剃眼眉，警隊直情甩晒鬚。

講開又講，警隊最近唔知搞邊科，形象插水插到殘。又有色魔警察強姦民女，又有水皮之槍抗賊射失，去到前日，竟然有大耳窿勒索案嘅證人遇襲，兇徒一刀劈嘴企圖「滅口」，明顯當警方冇到，更加有挑釁味道。喂，如果警方保護證人不力，邊個夠膽上法庭指證壞人呀？邊個願意幫差人儆惡鋤奸呀？

另外有一單案仲荒謬，有賊人潛入深水埗一幢住宅大廈偷走電梯大堂嘅閉路電視液晶體顯示屏，犯案過程由保安系統嘅高清鏡頭攝錄，賊人容貌清晰可見，保安員將「高清偷竊實錄」交畀警方。哈，敷衍得佢吖，警方求求其其查咗二十二日，居然宣布投降，回覆業主立案法團話捉唔到疑犯，所以終止調查。滑稽嘅係，本報得悉事件向警方查證，警方忽然由求求其其變得認認真真，重新啟動調查程序咁話。

喂喂喂，咪住先，警隊一哥唔係講過成立「誠信管理委員會」嘅咩？警察誠信到底有冇改善？計功夫茶話齋，警隊民望日跌夜跌，不如成立「民望管理委員會」，防止繼續失威吖嘛。

有乜辦法提升警隊民望？千里之行始於足下，既然旺角淪為鏹戰世界，第一步梗係捉拿擲鏹狂徒歸案啦，唔好畀人再有機會傷及無辜剃眼眉吖嘛！