上個月尾正生書院搵咗立法會會計界議員陳茂波（Paul）幫手做核數，順便將正生書院嘅帳目同正生會嘅分番開。尋日撞啱阿Paul同一班年輕人打籃球，阿Paul話正生書院校長陳兆焯打咗電話畀佢，話已經唔使佢幫手。原來正生董事會開過會，事後決定搵間國際性嘅會計師行嚟做核數。雖然忽然畀正生蹺起，阿Paul都好有風度咁話無乜所謂，並無唔開心，仲話好明白自己有雙重身份，係會有啲尷尬咁話。
既然阿Paul咁睇得開，咁佢又會唔會送佛送到西，介紹埋間會計師行畀正生呢？阿Paul就話唔會，因為「手掌係肉，手背又係肉」，無謂順得哥情失嫂意喎！
睇番個比賽，唔係見過阿Paul打波都唔知佢咁勁，雖然對住一班後生仔最後都係輸波，但成隊有一半分係阿Paul攞嘅，成績已經相當唔錯。同場仲有立法會建築、測量及都市規劃界代表劉秀成，上年度佢踢波撞親頭，搞到入埋醫院，但尋日都肯繼續親身上陣，仲打得相當落力，雖然攞唔到分，但體育精神贏晒！