財爺曾俊華嘅金融海嘯「曙光論」畀人摑咗一巴又一巴，佢尋日再喺網誌上吹噓自己「穩金融、撐企業、保就業」掂掂掂。不過合和實業主席夫人胡郭秀萍、中華總商會副會長方文雄同福建社團聯會主席林樹哲都唔多覺鬍鬚曾幫到手，認為靠自己好過。
胡太、方文雄尋日出席林樹哲喺會展搞嘅一個活動，啱啱同老公胡應湘去完長江三峽遊山玩水兼搵商機返嚟嘅胡太同卓妮講，保就業呢家嘢，合和自己都搞得掂，一日未去到最惡劣嘅環境，佢哋都唔會炒人。至於話撐企業，胡太話佢好多中小企朋友都好困難，希望政府着墨多啲幫佢哋。穩金融呢？股票係有得升，但胡太覺得暗湧多，佢都唔敢亂出手，仲叫各位靚太姊妹要小心波動。
方文雄唔覺個市好咗
胡太又同卓妮自爆，話佢喺歐美、香港同澳門都有物業，有樓、有舖有廠咁啦，不過呢排都唔急入貨住，因為樓巿升得好急，連中高收入嘅人都難以應付，不過胡太話唔望見到跌市，畀大家有機會撈底喎。
鬍鬚曾又喺網誌度話依家交通工具多人搭咗、商場又多人行，方文雄忍唔住暗寸話，可能佢搭車同鬍鬚曾唔同線，所以唔覺港鐵多人搭咗，不過呢排天口㷫就肯定多人入商場歎冷氣咁話。方文雄仲話依家銀行肯放水，所以中小企先無咁手緊，但係保就業就仲係差啲，佢好多零售朋友都唔覺個巿好咗，所以都唔敢請人，等聖誕個巿好番啲先算。講到金融，佢話依家息口低，係投資機會，不過都係嗰句，有閒錢先好投資。
林樹哲叫政府實際啲
林樹哲就好厚道，佢話今次係全世界一齊出手穩定海嘯，言下之意即係唔係靠一人之力囉！但係復甦過程無咁快，事關香港嘅實體經濟未見有好轉，政府係畀到信心巿民，但信心咁縹緲嘅嘢無量化標準，所以寄語政府要積極同有效啲，仲要及時同貼近實際啲。
卓妮