「時下好多青少年只顧打遊戲機，只懂問屋企攞錢，完全無養家觀念；如果唔立定志向，將來做乜呢？女嘅都仲話可以嫁人，但男嘅都唔知點算！」家傑嘅說話有點恨鐵不成鋼意味。他憶述，自己六、七十年代讀書時，同學之間都會坐埋諗吓搞啲小生意，但現在好少見有青少年咁諗。他引用明代教育家王陽明嘅名句：「志不立，天下無可成之事！」勉勵青少年要立志。

家傑狠批電車男之餘，亦明白香港發展潛力和空間愈來愈窄，好似中秋月餅款式設計五花八門，但可以攞去邊度賣呢？市場明顯窄咗，他勸勉大學畢業生唔好怕蝕底，應該北上發展，佢話：「好多人話內地人工低，又要捱，但內地發展潛力大，今日係咁啫，將來未必係咁；好似上海將來發展成金融中心，到時人工未必低過香港，但到時先至決定上去發展，就已經太遲嘞！」

多運動防濫藥

對於青少年濫藥嚴重，家傑都有自己一番見解。佢認為，政府及家長應該鼓勵青少年多做運動，當定下目標後，就會漸漸發現自己需要更多體能，於是勤於操練，自然無咁得閒去濫藥，亦唔會做電車男。講番今次企業參觀學習計劃，家傑好高興第一次搞就咁成功，參加計劃嘅青少年同家長都好滿意，當然佢自己都好滿意啦，稍後會檢討計劃成效，明年暑假再添食喎！

家傑嘅弟弟李家誠同太太徐子淇近日誕下細女李晞兒（Hayley），已經有三個月大，做爺爺嘅四叔李兆基心情勁靚外，再做大伯嘅家傑亦好開心，佢話一星期會見Hayley一次，雖然Hayley好得意，但家傑反而掛住家姐嘅仔女多啲，事關十幾歲啱傾啲喎！問家傑會否考慮自己生番個BB？家傑好鬼馬話：「你又唔係娛樂記者，所以我係唔會答你嘅！」不過，估計四叔都有興趣知道答案。