你去機場搭飛機又點呢？通常你會有少少緊張，因為保安員檢查行李嘅時候，你唔多唔少都會疑心生暗鬼：咦，佢會唔會將我好人當賊辦㗎？會唔會質問我有冇帶違禁物品㗎？點不知，名義上負責捉賊嘅保安員，自己先至係賊！

香港機場保安公司爆出令人髮指嘅醜聞，一位來港旅遊嘅美國女遊客上月二十五日經港返美，佢返到屋企之後發覺有一千元美金不翼而飛，懷疑喺香港機場接受行李檢查嘅時候失咗，於是打電話投訴。機場將案件交畀警方處理，差人調查後發現，當日負責檢查行李嘅三十幾歲保安隊長有古怪，懷疑佢就係膽大包天嘅機場老鼠，結果將佢拘捕，揭發有人賭波賭到山窮水盡，所以鋌而走險。

你以為全個機場淨係得一隻老鼠咩？錯嘞，機場保安公司發覺有敗類由於賭波而淪為竊賊之後，派出臥底搜查線索，順藤摸瓜睇下仲有冇老鼠。唔查猶自可，一查弊傢伙，保安公司原來有成竇老鼠！

臥底發現，竟然有一個賭波集團喺公司之內運作，非法開賭之餘，仲向欠債嘅賭客放數收息，迹近大耳窿。保安公司於是報警，重案組採取拘捕行動，檢獲值十幾萬元波纜，同埋一部來歷不明嘅iPod，有可能係偷番嚟嘅賊贓。警方破獲機場老鼠竇，前後一共拘捕三人，另有十人停職。

呢嗱，問你羞唔羞家？香港乜架都畀呢班機場老鼠丟清光！人哋受害者係美國遊客，知道成件事嘅真相之後，好大機會通街唱：香港機場有賊呀！美國同胞唔好去呀！

即使係香港同胞，見到咁嘅事都驚啦，畀你檢查行李原來係送羊入虎口，萬一保安員話要入房問話，邊個夠膽保證唔會出現差館強姦案翻版？

唉，又話香港國際機場喺全球排名第一，質素好到冇人有，呃人嘅，金玉其外，敗絮其中。

話時話，機場保安公司嘅老闆係邊個？佢老闆點解會請一班老鼠做保安？原來，成立於一九九七年嘅機場保安公司係由特區政府以及機管局共同擁有，全公司有三千人員，負責安檢、巡邏、護照驗證同埋看守飛機等等。至於公司嘅一哥咯喎，例牌係由警隊調過去嘅，所以有一套類似警隊嘅管理模式。

哦，明白晒，又係特區政府老毛病發作，任由旗下子弟兵胡作非為。講到尾，樹大有枯枝，族大有乞兒，連正牌嘅警隊都有色魔咯，機場保安公司作為類似警隊嘅物體，有偷錢開賭嘅老鼠損害香港聲譽都唔算過分離奇。計功夫茶話齋，美國嗰位女遊客，如果決定親身來港去差館提供資料，最好帶多幾個朋友傍住，你知啦，香港真係乜嘢怪事都可以發生！