立法會議員余若薇（Audrey）出名識扮靚，個個禮拜開立法會，着衫都極少有重複，鞋、首飾、手袋亦全部襯過晒先出街，尤其鍾意穿着長裙同掛滿各種各類嘅首飾，紅橙黃綠青藍紫乜色都有。不過可能青年人都反叛，佢三個囡囡嘅衣着品味就同媽媽好唔同，仲試過將佢花咗一番心血挑選嘅衣飾禮物彈回頭，搞到佢以後都唔敢再亂咁幫啲女買嘢，令佢極之無奈兼冇癮！
卓妮早幾日喺置地廣場地庫一間首飾店撞到Audrey，見佢耳環、手環、戒指乜都揀吓試吓，但搞咗成二十幾分鐘都睇唔啱，最後都係空手出番嚟。問佢係咪專程嚟買嘢，佢就話純粹係食完飯有空檔就嚟逛吓，冇乜特定目標。
生女不知女心肝
Audrey又好沮喪咁同卓妮講，啲女細個時佢成日都有幫佢哋扮靚，但稍為大個啲「脫離佢嘅魔掌」後，衣着打扮就好似專登要同媽媽作對咁，終日都係Ｔ恤牛仔褲，顏色就算唔係黑色都係淨色，媽媽買親乜嘢畀佢哋都話唔啱，仲試過將佢千挑百選買嘅一條珠鏈彈回頭，最後要佢自己戴番，後來有人見到佢條珠鏈，仲大讚佢好有眼光。總之就係屋企養咗三個反對黨。
要諗計「對付」反對黨，都唔係完全冇辦法嘅，事先諮詢囉。最近佢二女喺英國大學畢業，Audrey就幾經辛苦先諗到送手袋做禮物，佢將個袋嘅圖片電郵畀囡囡過目，等佢拍咗板先夠膽買。不過早前一家五口坐郵輪遊波羅的海，竟然令佢有意外收穫，原因係船上有餐晚飯規定要formal dressing，佢十幾年來首次見到三個女一齊着裙，令佢感動不已，心諗可能要等到其中一個女兒出嫁，先再有機會見到呢個場面。
唔怕囡囡變o靚模
Audrey話啲囡囡唔鍾意作性感女性化打扮，唯一好處係唔使擔心佢哋會變o靚模。而超鍾意shopping買嘢嘅佢，近年惟有將視線轉移到老公身上，包辦晒胡生嘅衣服鞋襪嚟止癮。
卓妮