煲呔曾喺○七年參選特首時，為爭取支持，誓神劈願話會加強同港區人大政協溝通，包括每年最少見兩次面。佢當選後雖然實踐諾言，但內容質素就同班人大政協期望嘅差好遠，淪為口水會唔在講，有時仲要變成煲呔曾嘅發洩對象。

拒淪發洩對象

好似喺去年下半年嘅一次會面中，資深港區人大劉佩瓊就大學資助問題為港府出謀獻策，但煲呔曾完全當佢冇到，事後佢私下表示以後都唔會再出席同類會面。喺年初嗰次會面，本身喺中銀香港做高層嘅港區人大吳亮星質疑港府監管金融產品不力，更加畀煲呔曾反責佢其身不正，激到星爺差啲想中途離場抗議。

唔知係煲呔曾近年民望急跌自己知衰，定係因為佢背脊畀人篤到穿晒窿，想唔做番啲嘢補鑊都唔得，今年佢特別將同港區人大嘅會面，列做連串施政報告諮詢會嘅頭炮。煲呔曾喺會上嘅態度，亦同過往幾次一百八十度轉變，表現得好有誠意聽大家講嘢，有回應有追問，十分畀面。

可惜煲呔曾呢啲轉變來得太遲，三十八名港區人大中，只有十八人出席尋日會面，即係足足有一半人唔畀面煲呔曾，包括曾經有過不愉快經驗嘅劉佩瓊同吳亮星。對於煲呔曾講明今年份施政報告會以虛無縹緲嘅發展六大產業做主題，大部分與會者都冇陪佢癲，反而唔少人不約而同批評港府打擊青少年吸毒不力，教育、宣傳同執法做得唔夠，單靠校本驗毒一定搞唔掂。

做過行政會議成員嘅陳智思，係少數有就六大產業發言嘅與會者，佢認為香港好有潛力發展私營醫療服務，但又呻有關問題佢幾年前就開始講，暗寸煲呔曾慢幾拍同將啲好意當做耳邊風。佢又話今次會面安排喺政府總部西翼，唔係好似上次咁喺禮賓府舉行，選擇正確，因為根本唔會有咁多人嚟，搵太大間房傾偈反而唔方便，再寸煲呔曾冇人畀面，拳拳到肉。真係話之你係特首，一樣冇面畀！