香港青年聯會共一百五十人尋日上午喺觀瀾湖開年度集思會，新任主席陳仲尼本來同屋企人喺加拿大度假，都獨自提早返港帶隊北上，青聯副主席朱鼎健（Ken）就做東道主，免費供應食宿同會議場地。今年撞正青少年濫毒問題炒得火熱，全城憂心，成班三十出頭嘅名人富豪二、三代坐埋一齊，度橋抗毒。
青年吸毒問題遍及各個階層，「霍老」霍英東長子嫡孫霍啟剛、遠東發展創辦人邱德根嘅幼子邱達根，同埋莊士集團太子爺莊家彬，尋日同卓妮傾起時，都話自己無吸毒經驗，亦無朋友吸食，仲同聲為沉淪毒海嘅青年人感到惋惜。今年廿九歲嘅莊家彬話，網民流傳一句話：「索Ｋ平過唱Ｋ」，反映問題真係好嚴重，慶幸佢喺美國讀中學同大學嘅年代，毒禍仲未盛行。
落力諗計精神可嘉
啟剛去年集思會大談政改，頭頭是道，尋日講青年吸毒，一樣有板有眼。佢話政府抗毒唔可以頭痛只顧醫頭，驗毒只能治標，未能治本，青年吸毒源皆因疏於管教，心靈空虛。由佢擔任主任、莊家彬做委員嘅青聯文化體育委員會，尋日經過腦震盪後，打算嚟緊同體育團體如體育學院等合作，舉辦唔同類型嘅課外球賽，等啲青年人精神有所寄託，唔使寄情毒品，話唔定電車男都會少啲咁話。
由榮興集團第三代葉振都擔任主任、人大常委范徐麗泰兒子范駿華做秘書長嘅青聯學界委員會，就會同青聯轄下嘅政策委員會攜手，睇吓搵大學合作，研究預防濫毒方法。成班後生仔咁落力，成效未知，但精神可嘉。
校本驗毒各有睇法
不過，講到政府全力推動嘅校本驗毒計劃，唔少人覺得自願驗毒效用不大。范駿華話，計劃喺實施上有困難，自願缺乏成效，強制又侵犯人權，所以最好由教育入手。葉振都就話，聽到好多學生反映，話吸毒情況確實好嚴重，但自願驗毒難有成效，最好係強制驗毒。不過邱達根就擔心，校本驗毒歐美冇先例，擔心令國際社會覺得香港吸毒情況好嚴重，以為人人吸毒，影響香港形象，寄語政府要小心推行。
卓妮