勢估唔到，家陣嘅紀律部隊簡直就係乳臭未乾嘅細路仔，呢個擘大喉嚨嗌「我唔制呀」，嗰個又典床典蓆叫「我又要呀」。唉，講真，功夫茶覺得相當眼冤。

紀律部隊爭薪行動愈來愈混亂，而且愈來愈混帳，始作俑者係警隊，佢哋居然喺經濟惡劣成咁嘅時候要求逆市加薪喎，仲語帶威脅話要上街遊行。好衰唔衰，特區政府作為阿媽，的而且確又係偏心嘅，警隊喺紀律部隊之中已經係最高薪㗎啦，阿媽竟然好溫柔咁樣暗示，得得得，慢慢傾。

咁就死火嘞，其他紀律部隊一個二個扁晒嘴，齊齊攞隻手指兜口兜面篤住曾蔭權大鬧：哦，慈母多敗兒！

點解話曾蔭權係慈母？冇嘅，鬼叫佢自稱對警察有深厚感情咩。煲呔曾為咗打消警隊嘅遊行計劃，一於賣溫情數白欖：「我嘅父親係警察，我嘅細佬係警察，我嘅弟婦係警察，我嘅叔叔係警察，我嘅表兄弟亦有當警察嘅。」

假如你係消防，你嘅父親係消防，你嘅細佬係消防，你闔家大小老爺奶奶都係消防，你會點諗吖？你可能酸溜溜咁諗，使唔使咁階級主義呀！

事實上，懲教人員總工會主席潘志明上電台就係咁質疑：「係咪要返番去清朝，返番去封建帝制嘅年代？拉關係、附權貴？唔通特首個仔同新抱做緊醫生，下一代就話做醫生嘅有運行？」

講到呢度，大家到底知唔知道發生乜嘢事？簡單咁講，因為曾蔭權對警隊偏心，所以其他紀律部隊夾埋作反，一時爭取同工同酬，一時又要縮減工時，總而言之就係要得到警隊一模一樣嘅待遇。假如警察要求逆市加薪成功呢？到時咯喎，更加大煲，功夫茶相信其他紀律部隊真係會坐言起行輪流罷工。

嗱嗱嗱，你話係咪眼冤吖？阿媽偏心已經係唔妥，碰啱幾條化骨龍又得寸進尺，扁嘴扭計嘈喧巴閉。如果真係返番去封建帝制嘅清朝，功夫茶唔介意將一干人等推出午門斬首！

喂，好心睇下個市啦，失業人數二十萬，唔係減薪就係裁員，風頭火勢你去典床典蓆爭取加薪？捧住鐵飯碗你扁晒嘴要求換一隻金飯碗？你試下去非洲索馬里扭計，埋怨自己冇得魚翅撈飯吖，餓到兩眼發青光嘅海盜肯定會掟你落海餵鯊魚！

講到尾，罪魁禍首始終係曾蔭權嘅親疏有別。用人唯親吖嘛，特別偏心吖嘛，唔係姓曾嘅咪嘈到拆天囉，唔係警察嘅咪鬧到反艇囉。

紀律部隊爭薪爭到立立亂，計功夫茶話齋，撥亂反正嘅辦法好簡單，同工同酬，不偏不倚，一律減薪！