疑似特首候選人、行會召集人梁振英（CY）近期無處不在，接連出席兩個「輸輸聲、唔好聽」嘅推廣讀書活動，又公開力撐G模，嚟緊佢仲會同來自全港十八區嘅區議員舉行午餐會，搶閘向呢批潛在選民見工面試，認真搏盡！
立法會區議會代表尋日向全體區議員發請柬，話為咗加強區議員同行會成員聯繫溝通，下月十一日邀請咗CY出席午餐會，就地方行政發展作專題演講，歡迎各區區議員報名出席，每人收費三百大元。其實過去亦有行會成員不定期同區議員食飯會面，但好多時只會見區議會正副主席，從未試過今次咁大陣仗。
須知唔少區議員身兼不同界別嘅選委會成員，如果政府決定「翻叮」○五年嘅區議會政改方案並得到通過，全港五百多名區議員都有份投票選特首，自然係下屆特首選舉嘅最大單一票倉。究竟今次午餐會係純粹演講，定係有人想搭個台畀CY搶閘拉票，只有當事人才知道。
有區議員就滿腹牢騷，話CY雖然喺香港政壇打滾多年，但未見佢搞過乜嘢地區行政，而且活動係CY做主角，佢哋做配角反而要畀三百蚊，好搵笨。不過如果CY話請晒五百多名區議員食飯，大家應該仲驚，事關分分鐘畀廉記請去飲咖啡。