好多香港人放大假去外遊叉電，都會大吃大喝同瞓到黃朝白晏，立法會議員葉劉淑儀上個星期帶埋囡囡去泰國布吉旅遊，就過得比較健康。葉太同我哋話，佢每朝起身做運動，食完早餐唔食晏，等到傍晚先至放縱自己擦餐勁，否則面對當地嘅價廉物美嘅泰式美食，真係想唔增磅都幾難！
葉太喺○一年做緊保安局局長時，已經帶過囡囡去布吉，今年暑假佢哋就決定重遊舊地玩多次，囡囡仲叫埋佢喺美國讀書時認識嘅一位台灣女同學作伴。葉太大讚當地嘅旅遊業搞得好好，海灘大酒店靚就唔在講，啲嘢食又平又新鮮，夜生活又有聲有色，香港真係拍馬都追唔上！
今次葉太仲首次帶埋囡囡去睇人妖表演，不過佢強調佢哋睇嗰個表演最多只算二級半，睇吓啲人妖扮鬼扮馬搞吓笑，絕對冇色情成分，佢同囡囡一齊睇都完全唔覺得尷尬。
葉太計劃遲啲會再去深圳同澳門玩幾日，到九月就會陪囡囡去美國開學，仲會應邀喺囡囡就讀嘅賓夕凡尼亞大學進行專題演講，主題係香港嘅政制發展，預計聽眾當中有唔少香港人。