卓妮上周五貢去參加「海外學生仁濟夜2009」慈善餐舞會，Josephine同二家姐邱詠賢（Wendy）孖公仔出席。講開青聯補選會董，Josephine話未知結果，但佢不忘推銷政綱，話當選後最想幫後生仔搵工：「我覺得香港大學生好叻，讀好多書。我哋家族喺亞洲有近卅間酒店，香港有七間，嚟緊呢一、兩年仲會開多四間，需要好多人才。」太子女開到口廣招有能之士，大家快快手寫定自薦信嘞。

金融海嘯及豬流感衝擊酒店業，但Josephine話冇有怕，近日反而簽多咗銀行客同長期客，事關佢哋開嘅多數都係三、四星級酒店，喺眼前嘅經濟環境下反而多咗生意做；佢哋九月仲會喺上海浦東開新酒店，成都新酒店亦會陸續開幕，不愁客路。

吳守基打人情牌撲水

二家姐Wendy都相當能幹，包辦晒家族旗下酒店嘅室內設計，原來Wendy唔係讀設計出身，半途出家進修，但做得有板有眼，秘密原來係經常做「神秘顧客」去其他酒店偷師，又微服出巡去旗下酒店嘅餐廳試菜，Wendy笑言試菜試到肥晒，兜個圈讚自己餐廳啲嘢好味。

同場嘅仁濟董事局主席吳守基就為「撲水」頭痕，遇着經濟不景，伸手問人攞錢甚艱難，惟有大打人情牌，近日招攬咗板長壽司老闆鄭威濤（Ricky）及米蘭站老闆姚君達加入仁濟做總理，佢哋都有出席上周五嘅仁濟夜。

卓妮