不過唔係喎，特區政府今年一月一日開始有券派，雖然派嘅只不過係醫療券，唔可以用嚟消費購物，但衰衰地話晒可以畀長者用嚟睇醫生，而且覆蓋幾全面吓，睇西醫又得，睇中醫亦得，甚至係牙醫、脊醫、物理治療乜都得，聽落就幾吸引。可惜，呢啲醫療券唔係「好過冇」，而係「有等於冇」。

有團體做過調查，發現雖然大部分長者知道有醫療券呢樣嘢存在，但當中有近八成合資格長者冇用過，事實上，紙係包唔住火嘅，連衞生署都爆響口話截至今年五月底，唔夠一成半合資格長者用過醫療券。

咁就奇怪嘞，睇吓年年盂蘭節派米，唔理係打風落雨抑或烈日當空，都有大把老人家排長龍等攞米，依家有券派都唔吼？確係令人爆頭喎。

鬼咩，政府對老人家好似施捨咁，派得既孤寒又刻薄，一年得二百五十蚊咁大把，老人家睇一次醫生，可能用晒一年醫療券都唔夠，分分鐘要自己倒貼，計埋仲貴過睇政府門診！

咁都未夠衰，唔知邊個高官度咗個醫療券網頁出嚟，登入程序繁複到爆，所以參與醫療券計劃嘅醫生本來已經唔多，依家再畀套電腦系統煩多兩煩，愈來愈多醫生索性退出唔玩。

依家醫療券同三年零八個月剩低嘅日本軍票差唔多，都係得物無所用，當局唔立即諗辦法解決，例如增加金額、簡化程序，遲早摺埋，連檢討都慳番。

其實要檢討嘅何止係呢個醫療券制度吖，更加應該檢討嘅，係成個公共醫療制度至啱呀！

嗱嗱嗱，醫管局日前公布咗最新一期《風險通報》，公立醫院喺去年十月至今年三月嘅短短半年間，一共發生二十五宗嚴重醫療事件，害到十三個病人入咗去公立醫院出唔番嚟。

公立醫院烏龍百出，嚴重醫療事件千奇百怪，單係遺留喺病人體內嘅物件，已經夠晒匪夷所思，包括血管內擴張器、導管嘴、餵食胃喉等，諗得出嘅、諗唔出嘅都有。當中最大一件，係一個長達八吋嘅軟金屬牽引器，係醫護人員為病人切除盆骨腫塊手術時留低，搞到病人要白白捱多刀攞番出嚟，都算係無妄之災嘞！

至於嚴重藥物事故，一樣係離譜到講都冇人信，有醫護人員向一名初生嬰兒注射咗比正常劑量高近九倍嘅嗎啡鎮靜劑，十五分鐘之後至有人發現，搞到個嬰兒要送去深切治療部。鬼咩，醫管局一味肥上瘦下，前線醫護人員做到踢晒腳，想唔出事都難啦。

難為成班高官嘅面皮成丈厚，夠膽死將「醫療服務」納入「六大優勢產業」，仲要大力發展咁話，真係笑大人個口呀。計功夫茶話齋，香港公共醫療衰到貼地，救人隨時變害人，反正公立醫院成個閻王殿咁款，不如發展做酆都鬼城好過啦！