ＷＫ坦言，官員經常在立法會被議員鬧，咪以為好冤屈，只要諗深一層，真正掌權係政府和官員，大不了只係被人挑戰；相反，如果政府要運用權力踩一個無權嘅人，後果可以杰撻撻，所以佢寄語官員要謙虛，先至真正聽到庶民嘅聲音。對於新一屆立法會出現掟蕉文化，ＷＫ話立法會嘅角色就係要反對當權者，做得官員就預咗會畀人鬧，至於議員嘅行為啱唔啱，應交由選民判斷。

縱橫官場幾十年，ＷＫ遇過叻人無數，其中一個係教育局局長孫明揚，佢讚揚孫公過去處理過不少棘手政策，但至今行出來嘅神情仲好瀟灑。佢憶述，七十年代地政專員到新界收地，要有心理準備畀人「淋屎」，事關新界人不滿政府賤價收地，以高價出售圖利，但當年搞地政嘅孫公三扒兩撥就同鄉議局達成收地賠償機制，當時喺環境科任職嘅ＷＫ從中偷師，學咗啲乜嘢，ＷＫ就無交代嘞。最近孫公為正生單嘢受靶，聽完ＷＫ呢番話，唔知會唔會感覺好啲呢？