前經濟發展及勞工發展局局長葉澍堃（Stephen）以前做官頻頻拆彈，退休後就頻頻「發蛋」，拜師「阿一鮑魚」楊貫一學煮廉價鹹魚炒蛋、阿一炒飯，炒得不亦樂乎。一哥剛獲世界御廚協會頒發獨一無二嘅「御廚大師」獎，成為亞洲首位華人獲此殊榮，做徒弟嘅Stephen早幾日親自上門祝賀，仲專程到書展購買一哥新作《朝陽貫一方》畀一哥簽名做紀念，確係尊師重道！
Stephen與一哥相識幾十載，兩個仔自細食一哥點心長大，最愛燒賣、鵝掌、灌湯餃，退休後講飲講食，自然同不斷鑽研廚藝嘅一哥合晒合尺啱晒Key啦！Stephen過去跟一哥學過幾味菜式，佢早幾日登門拜訪祝賀一哥時，一哥就即場再傳授多一味「豉油王煎焗雞」，竅門係先將雞髀拆肉，搵調味料醃一醃，然後用燒酒及薑葱香煎，雞肉食落入味又香滑，最重要係簡單易做。
海南雞飯正到痹
今次Stephen學到意外之「菜」，於是禮尚往來，匯報其最近新加坡美食之旅，重點推介牛車水附近嘅發記潮州菜館和唐人街Maxwell Food Court Market內嘅天天海南雞飯，食完豎起拇指讚不絕口。Stephen話，發記至今已經係第三代經營，菜式多以古法炮製，例如蒸䱽魚咁，會加水、酸梅、鹹欖、茼蒿，蒸七分鐘，䱽魚出奇地鮮味，而水變成好靚嘅上湯，從未試過咁好食。
至於天天海南雞飯，Stephen更加形容「正到痹」唔講得笑。佢話雞肉、雞湯和飯粒都好入味，雞滑飯香，令人回味無窮，但只係賣三元坡紙，約為港幣十六元，簡直抵到爛，好嘢例必多人幫襯，所以佢同太太Nancy足足排咗四十五分鐘先至買到。既然咁好食，排耐啲都抵番啦！
意國特產攞唔晒
一哥就分享日前到意大利領獎嘅威水史，在世界御廚主席Gilles Bragard手上接過最高榮譽嘅「御廚大師」獎，並在總統府與意大利總統Giorgio Napolitano（納波利塔諾）及夫人拍照留念。
一哥領獎後再到羅馬、Assisi（聖方濟各出生地）、佛羅倫斯及梵蒂岡旅遊，幾個地方市長均有設宴款待佢，當地機構又送上好多特產，包括百年陳醋、橄欖油、芝士等，一哥話多到攞唔晒。Stephen聽到就笑稱：「攞唔到就等我幫你攞嘛，啲百年陳醋係好嘢嚟㗎！」Stephen認真識貨啦。
卓妮