橄欖早前收到有議員要求緊急開會後，立即透過秘書處去信其餘十八名委員，諮詢佢哋有冇需要就今次任命開會，結果只有七名委員支持開會，包括六名泛民主派議員同建制派裏面嘅「反曾」悍將葉劉淑儀；反對開會嘅就多達九人，全部來自建制派，包括經濟動力嘅林健鋒同梁君彥、民建聯嘅黃定光同李慧琼、仲有金融界李國寶、專業會議石禮謙、自由黨方剛、金融服務界詹培忠同保險界陳健波，中總黃宜弘同會計界陳茂波就因為唔喺香港而冇回覆。

就人數問題各執一詞

橄欖最後以少數服從多數為由決定唔開會，但班「反曾」議員就唔係咁睇，質疑委員會嘅法定開會人數只須七人，依家啱啱好有七名委員支持開會，加埋主席更加有八人，冇理由因為有部分人唔得閒或者唔想開會，就剝奪其他委員嘅開會權利。佢哋又認為橄欖應詢問議員有邊日得閒或者唔得閒，冇理由問人需唔需要開會，令人懷疑佢偏幫政府，簡直就係赤膊上陣幫鬍鬚曾擋箭。

橄欖就同我哋解釋，平日委員會決定會唔會就其他議題開會，都係由委員以簡單多數投票決定，佢今次咁做係依足規矩辦事，同佢個人支唔支持開會無關。佢又話回覆支持開會嗰七名委員，部分人根本就唔喺香港，就算真係開會都未必趕得切返嚟，最後搞到流會仲難睇。不過有議員就表明唔接受橄欖嘅解釋，會喺十月復會後再次要求開會，傳召鬍鬚曾同到時已經上咗任嘅攞命陳一齊上嚟受靶，甚至連橄欖都一併審埋。