之不過咁，省鏡還省鏡，經機會草草收場拆招牌，證明空口講白話唔捱得幾耐。始終曾蔭權只係「政治家」，唔係風水佬，冇辦法呃你十年八載，更加冇可能掘個窿即刻事事順利。

經機會執笠大吉，唔代表危機已經唔存在。事實上，香港下半年面對多項社會危機，「政治家」有冇辦法親自掛帥率領文武百官克敵制勝呢？講真嗰句，當危機遇上弱雞，冇人夠膽心存僥倖。所謂弱雞咯喎，咪就係出晒名弱勢管治嘅特區政府囉。

不如睇睇市民心目中最關心嘅係乜嘢社會危機先吖。根據「東方報業民意調查」顯示，四成七受訪者認為，政府下半年最應該優先處理經濟民生以及失業問題；三成一希望解決青少年濫藥；一成二覺得要處理豬流感停課安排；百分之六想政府突破粵港合作發展停滯不前嘅困局。

好嘞，既然經濟係市民最關心嘅，政府有冇大力促進經濟呢？冇辦法，弱雞即係弱雞，大部分市民睇唔到政府有料到。四成二受訪者認為，政府未能尋找經濟新增長點；兩成四覺得，當局未能保就業、撐企業；兩成一質疑政府對金融海嘯束手無策。

呢嗱，咁咪死火囉，香港失業率處於四年新高，失業大軍超過二十萬人，官老爺居然好似未瞓醒咁，搞到問題愈來愈惡化。功夫茶有少少擔心，二十萬失業大軍等於二十萬計時炸彈，爆起上嚟真係唔知有乜嘢後果。

至於講到解決青少年濫藥咯喎，情況都唔係咁樂觀。三成二受訪者直斥政府禁毒工作最失敗係未能打擊毒品源頭；三成市民批評當局冇加強刑罰，現行措施欠缺阻嚇性；兩成七覺得禁毒工作係臨急抱佛腳，冇周詳計劃。

唉，小朋友沉淪毒海梗係唔啱啦，返學公然集體索Ｋ確係離晒大譜，更加令人覺得可悲嘅係，即使小朋友決心痛改前非，希望戒毒做番正常人，你估官老爺可以幫到手咩？睇睇正生書院遷校風波，你就會發現官老爺唔止係弱雞，簡直係盲雞，由頭到尾發雞盲，從無正視戒毒學校嘅需要，搞到正生書院嘅同學仔受盡委屈聲淚俱下。

另一個危機係豬流感，政府提高停課門檻，四成九受訪者直指新措施未必適合所有學校，應該畀學校彈性處理；一成六認為做法不切實際；另外一成六覺得會令到流感爆發規模擴大。

特區政府長期積弱，主要原因係官僚作風拖慢施政效率，再加上做事畏首畏尾，一怕錯，二怕鬧，卒之就陷入愈窮愈見鬼嘅怪圈嘞。有冇辦法改善呢？計功夫茶話齋，狗急就要跳牆㗎啦，曾蔭權不妨真係試下喺禮賓府掘個窿，斬雞頭，燒銀紙，未必唔可以醫好官僚嘅弱雞病。