早前收爐嘅經機會提出要將醫療服務提升為香港六大優勢產業之一，政府話計劃預留四幅分別位於黃竹坑、將軍澳、大埔同東涌嘅地皮用作發展私家醫院，仲會喺今年底徵求發展意向書。「怪醫」醫學界立法會議員梁家騮就喺電台節目中拆穿政府嘅西洋鏡，話煲呔講就天下無敵，但做起上嚟其實完全行唔通。
怪醫話，私家醫院嘅服務對象多數係本地人，所以一定要起喺交通方便嘅地方先可以吸引到客人，但係政府提出嗰幾幅地都唔多就腳，新醫院起到無雷公咁遠，投資者可能因預視到難以同位於市區嘅醫院競爭而卻步。
怪醫又篤爆政府，話唔明點解要預留有幾個足球場咁大嘅地方起私家醫院，依家私家醫院一般佔地零點零六至零點七公頃，而政府預留嘅幾幅地足足有成二點二至四點八公頃咁大，梗係喺市區搵唔到適合嘅地皮啦。地愈大，要投資嘅錢就愈多，成本最終又係轉嫁到病人身上，其實喺市區搵間空置學校，都可以改建成私家醫院。政府搞到咁大個頭，隨時都埋唔到尾喎。