行政會議召集人梁振英（CY）近期做咗搭訕王，除咗將自己貼緊社會大小事務，但凡地震海嘯，都同佢有關，有機會佢又會毫不吝嗇咁去表揚一啲自己相近嘅意見。佢上星期就發表咗一篇新網誌，大讚廠商會會長尹德勝寫嘅一篇關於貧富懸殊嘅專題，佢盛讚尹會長高瞻遠矚、有承擔，值得欽佩。
原來CY之前曾經去過廠商會演講，當日佢就用咗一堆香港收入分布嘅資料，解釋上年商界代表喺立法會選舉大敗嘅原因。CY讚揚咗尹德勝一大輪，最後仲補咗句話商界利益其實同總體社會利益唔係對立，而係一致嘅，商界如果願意多承擔責任，社會就會更和諧，營商環境就會更有利。
CY已經被認定為疑似特首候選人之一，佢嘅一舉一動，大家都會將佢解讀為對於競選特首嘅部署，今次佢喺網誌上嘅文章，雖然只係好短，敏感一啲去解讀，意義都好深遠，佢不單止好坦白咁向商界爭取支持，仲發表咗佢嘅政治理念，就係：「商界利益其實同總體社會利益唔係對立，而係一致嘅……」。