中大心理學系講座教授張妙清近日出書《登上巔峰的女性》，訪問全國人大常委范徐麗泰及立法會議員梁劉柔芬，尋日趁書展搞咗個新書分享會，請嚟兩人即場分享如何平衡家庭同事業。雖然兩位阿太風頭唔及班o靚模勁，但話題絕對有爆料性。范太大爆當年曾畀男上司歧視，唔畀佢升職；身為「潮州妹」嘅蘇菲就慨嘆屋企自小重男輕女，好嘢永遠無佢份，都幾淒涼。

范太慨嘆做女強人壓力大到透不過氣。原來當年打工時，曾經遇到一個思想傳統嘅男上司，升職時偏袒男同事，范太唔忿氣，走去問老闆自己係咪力有不逮，老闆回答話：「你（范太）賺錢買花戴之嘛，使乜咁緊張。」

冠以夫姓 徐爸爸嬲爆

范太覺得被歧視，即時寫咗長篇大論嘅文章「伸冤」，解釋過去幾年嘅工作成績，可惜爭取升職行動最後告失敗，但范太無後悔講出心聲，當覺得自己被忽略時，一定要據理力爭。

范太未嫁嘅時候，爸爸錫到佢燶，係一粒不折不扣嘅掌上明珠，就係因為爸爸太錫自己，所以冠以夫姓之後，爸爸竟然勃然大怒。話說當年嘅徐麗泰加入理工學院做工，政府機構嘅傳統做法，就係一定要將女性個名冠以夫姓，於是徐麗泰就變成范徐麗泰，無得揀，爸爸知道咗之後，嬲到不得了，猛問點解。

蘇菲都話童年唔得寵，後來嫁作人婦，奶奶同老公梁孔德都反對佢做嘢。但蘇菲天生係工作狂，極力游說老公「開綠燈」，後來躋身政商界成為女強人，每次工作有乜做得唔好，老公都會「批判」佢，蘇菲笑言，聽得多真係覺得好煩，惟有當佢「唱歌」。漸漸，蘇菲都深明喺呢個家嘅生存之道，就係每逢仔女有事商量，千祈唔好透過佢講，而係要仔女直接同爸爸同嫲嫲講，咁老公同奶奶就唔會埋怨佢嘞。

其實時至今日，梁孔德都唔知幾錫太太，蘇菲亦不忘補飛，話深知道老公好愛錫佢，唔想老婆出嚟做工，都係因為唔想佢太辛苦啫。