霍震霆前日以青色Prada風褸配牛仔褲嘅便服look，現身蘇樺偉新書發布會。原來二人早已有交情，蘇樺偉憶述有一次代表香港去希臘比賽時，因為當地嘅食物質素麻麻，所以一行人都冇乜胃口，當時同行嘅霍震霆得悉之後，竟然自掏荷包請大家食中國菜，令蘇樺偉對佢留下深刻印象。

自言小故事唔出書

近年有唔少名人、政客都會出書娛人自娛，唔知霍震霆有冇諗住學蘇樺偉咁出番本講運動嘅書呢﹖佢笑言，最近想喺家鄉開辦一個博物館，所以摷番唔少舊相出嚟，當中一張佢同爸爸霍英東喺某一屆東亞運動會時影嘅相，小霍話望住呢張相就勾起唔少美好回憶，不過，佢笑言：「運動方面我未必咁有天分，加上我嘅係小故事，茶餘飯後講吓就得，出書都係留番畀後生啦。」

霍震霆咁講實在太謙，大家都知佢本身熱愛足球、網球等運動，加上佢係國際奧委會委員，依家做埋○九東亞運動會香港籌備委員會主席，加上佢嘅疑似未來新抱係中國跳水公主郭晶晶，所以不論在公在私，霍震霆比起好多所謂作家，都更有資格出書。

卓妮