斌仔開宗明義話好多年輕人唔敢面對失敗，甚至為咗得到認同，明知錯都要做，希望呢本書可以令佢哋諗吓點樣用自己嘅方法面對失敗。沈教授好認同斌仔嘅講法，話依家父母太緊張小朋友，小朋友一跌低即刻拖住佢，所以佢教書時都唔敢鬧啲學生，怕佢哋走去跳樓。沈教授鼓勵父母帶小朋友參加比賽，等佢哋知道自己嘅不足，嘗試失敗滋味。

講番自己，原來沈教授小學時年年考第一，但中學考到一間好嘅學校，競爭大咗，成績一路跌，仲試過差啲考第尾。佢話人好多時睇得自己太重要，叫大家不妨去行山，見多啲大山、大海呢啲自然景色，自然體會自己好渺小。

嫻姐執着易受挫

成日笑笑口嘅肥胡話自己成日都失敗，淨係個大肚腩已經係好例子，畀人笑同醫管局嘅形象好唔夾。肥胡話自己年年驗身都一百分，又有做運動，就係個肚腩點都減唔到。佢又試過被一個幾十年嘅朋友呃錢，話投資失敗，佢最心痛係無咗段友誼。肥胡教大家用積極嘅心態面對失敗。

至於嫻姐，佢就話自己以前好執着，仲因此受咗好多挫折，喊過好多次。後來佢師傅寫咗一幅「滿即傾」嘅字畀佢，告誡佢千萬不要自滿，否則失敗會隨之而來。不過，難得呢三位嘉賓都係大忙人，全部都係啱啱落機趕嚟，斌仔認真夠面子！