NBA湖人巨星高比拜仁訪港，昨日接受本報訪問，有四個NBA總冠軍銜頭嘅高比仔，未來目標仍然係NBA總冠軍，仲有就係出席2012年倫敦奧運。高比仔話，香港人熱愛籃球，令佢好鍾意香港呢個城市。

Ｑ：你已經有好多銜頭，NBA總冠軍同奧運金牌都贏過，下個目標係乜？

Ａ：協助球隊做得更好，過往都係為自己進步，但依家想幫球隊進步，繼續贏得冠軍。

暢談未來，態度親切。	蟻摟蜜糖	高比現身尖沙咀，萬人空巷。

望打埋倫敦奧運

Ｑ：你認為自己能否打到2012年倫敦奧運？

Ａ：我當然想，代表美國隊係一個好值得同難忘嘅經驗，我會覺得好榮幸被選上，因為你係代表自己國家。

Ｑ：近期有好多轉會新聞，奧尼爾加盟騎士、阿利沙嘅離開同阿堤斯加盟？你覺得有冇加強湖人嘅實力，拿總冠軍會更有難度嗎？

Ａ：一定會難啲，我唔知新球員能否令球隊得益，又或會有乜變化，要睇吓我哋嘅進步同合作，同埋可以買到啲乜嘢人，會產生啲乜嘢化學作用去贏冠軍，呢個我會好期待。

Ｑ：你對球員轉會有甚麼評價？

Ａ：只係生意嘅一部分，雖然阿利沙同我好老友，但我只認為呢個係一盤生意，我會祝佢前程似錦，大家會為各自効力嘅球隊盡力。

Ｑ：勒邦占士話你打算明年再參加明星賽入面嘅入樽賽，你十幾年前曾經贏過呢個比賽，你今次係咪想再試吓？

Ａ：我要先澄清一下，佢冇咁講過，因為佢係我朋友，所以要幫佢解釋吓。但相信NBA球迷會好高興見到我哋比併，一定會好精彩，不過我十三年前贏過，已經覺得好開心。

女fans舞動偶像特製戰衣，心情激動。

三女孩獲高比送贈「即除」球鞋，喜出望外。

最想同佐敦1 on 1

Ｑ：如果要你揀一個曾經効力湖人嘅名宿進行夢幻對決，打場1對1，你會揀邊個？

Ａ：謝利韋斯（Jerry West），因為我哋喺球場上嘅表現幾相似，如果可以對佢應該幾有趣，亦有挑戰性。但如果要揀其他籃球員，我會揀米高佐敦。

Ｑ：點解你每次到訪亞洲，都會嚟香港？

Ａ：我應該嚟過香港兩、三次，感覺香港人對籃球好有熱誠，每次我嚟到呢度探訪，同班小朋友打波，都會畀佢哋對籃球嘅熱情感染，令到我好想再返嚟呢個地方，睇吓佢哋進步咗幾多。

Ｑ：亞洲球員應具備啲乜嘢條件先可以去打NBA呢？

Ａ：其實無論任何地方嘅球員都一樣，一定要努力，同埋要適應NBA比賽嘅速度。