中國病理學先驅侯寶璋過咗身三十幾年，但佢嘅貢獻延續到依家。尋日侯寶璋家人幫佢出咗本《侯寶璋家族史》，仲喺佢做過病理系主任嘅香港大學搞新書發布會。侯寶璋大家可能唔係太熟悉，但佢其中一個徒弟大家就成日見，就係行政會議成員梁智鴻（金刀梁）。大家可能會疑惑，金刀梁專長係泌尿科，同病理學有咩關係呢？原來金刀梁係侯教授最後一班教嘅學生，一開始金刀梁都係想讀病理學，點知恩師一番說話，改變咗佢以後嘅路向。
金刀梁憶述話，有次上堂，侯教授要金刀梁用顯微鏡搵一個有問題嘅細胞，但六○年嘅顯微鏡唔係好先進，內置嘅放大鏡好細，金刀梁搵嚟搵去都搵唔到個細胞喺邊。侯教授過嚟幫佢搵番個細胞先叫佢睇，點知金刀梁仲係睇唔到，當時教授慨嘆咗一句：「你都係唔適合讀病理學㗎嘞！」過咗幾日，侯教授又搵金刀梁幫手做解剖，見佢一搵就搵到需要嘅內臟，又話病理學唔啱佢讀！雖然嗰刻有啲唔開心，但正因為咁，金刀梁反思自己嘅出路，終於喺泌尿科得到驕人成績。
尋日仲有好多人撐場，包括港大校長徐立之、醫學院院長李心平、同侯寶璋其他愛徒楊紫芝、李健鴻等。楊紫芝話，當年侯教授雖然好嚴格，但都有親切一面，不時請佢哋成班學生返屋企食飯，所以連佢屋企人都好熟悉。