特首寶座嘅幾位疑似候選人磨拳擦掌，蠢蠢欲動。大家應該記得，喺「唐唐」唐英年仲做緊財爺時，金勞詹曾經向唐唐教路三招：派糖、爭做政務司司長，同埋叫背後兩個女人、即係唐媽媽同唐太收金口，事實證明，唐唐好聽話，三招用晒！最近頻頻搞政界飯局嘅CY，可能唔想執輸，同樣向金勞詹求教，不過，佢收到嘅錦囊，隨時幫佢變害佢。

30票任司長 10票做局長

金勞詹一口氣過咗六招畀CY，例如參選要態度明確，唔可以含糊；為以前講過嘅「N屆都唔選」主動解畫，唔好諗住側側膊扮失憶；請形象顧問，執靚個外殼；態度要誠懇；千祈唔好話自己有使命感，事關選民唔鍾意聽。而第六招，亦係最辣嘅一招，就係教CY一條籌組班底方程式，選賢唔使論才學，只要有選票喺手就得，可以幫手挖到三十票嘅，二○一二年可以做司長；有十票喺手嘅，做局長；如果得五票嘅，都可以做內閣，撈番個行會成員銜頭，抵到爛，各位商會領袖、政黨阿頭不妨諗諗佢。

金勞詹一向數口精，佢分析，二○一二年特首選舉照睇有三個人落場跑：唐唐、CY同○七年參選過嘅泛民代表公民黨梁家傑。假設選委會擴大到一千人計，梁家傑斷估可以攞到二百票，如果CY肯用呢條「賣官」組班方程式，三司十二局加十四個行會「疑似」成員，加埋CY自己嘅私伙票，夾埋會有四百五十票，咁就可以撼低唐唐嘞。金勞詹補多句，自己去年選立法會贏到開巷，都係用呢條橋㗎咋。

嘩！喺金勞詹眼中，班特區高官都算係Cheap，局長個價，只係值十張選委會選票，按佢嘅如意算盤，如果CY真係做特首，工聯會元老可以做財爺，中總會長可以執掌勞工及福利局局長，發展商代表做發展局局長，到時想唔天下大亂都幾難；就算廉署唔請CY飲㗎啡，CY都可能做唔夠一年就腳痛落台囉。