政府委任「公職王」鄭慕智（Moses）接替彭鍵基擔任離職公務員就業申請諮詢委員會主席，但被人話佢違反同一人不可同時擔任六項公職嘅「六六規定」。據聞Moses當初接受任命前，已注意到自己擔任公職數目將會違規，已辭去策發會及航空發展諮詢委員會兩項公職，所以現時只擔任六項公職。不過佢有佢自己嘅一套計法。
Moses現時擔任嘅公職包括：博彩及獎券事務委員會主席、教統會主席、廉署社區關係市民諮詢委員會主席、廉署貪污問題諮詢委員會當然委員、前任行政長官及政治委任官員離職後工作諮詢委員會主席，仲有最近委任嘅離職公務員就業申請諮詢委員會主席，都未計佢嘅港交所董事職位。
不過Moses認為，港交所董事一職，唔算係公職，只係上市公司職位，唔受「六六規定」約束；不過咁，港交所董事由財政司司長委任，政府扮無賴唔當係公職，真係「官」字兩個口，乜都佢講晒。據聞兩個廉署下面嘅委員會，只可以算係一個公職，咁又少多個。Moses擔任嘅博彩及獎券事務委員會主席任期即將屆滿，所以佢擔任嘅公職將會得番五項喎。
如果Moses咁計法，做十項八項公職都唔怕違規啦，睇嚟政府應該搵人出嚟講清楚至得！