煲呔愛將、民政事務局副秘書長Cathy朱曼鈴尋日同西九文化區管理局諮詢會主席張仁良，一齊出嚟同傳媒茶敍。記得上次茶敍時Cathy只係啱啱升官，之後無幾耐就爆出前西九文化區行政總監程少泉劈炮唔撈嘅事件，仲有傳聞話佢哋兩個唔咬弦。尋日Cathy一再否認傳聞，仲話程少泉上任七日，兩人見咗不過幾個鐘喎！
Cathy五月底升官前，畀二十面體行政總裁胡恩威喺電台上大鬧佢為官高高在上，唔同業界溝通。點知升官一個月左右，當時只係返咗七日新工嘅程少泉突然以私人理由辭職，當時有傳聞直指同Cathy有關，話一切因為兩人唔咬弦所致。
尋日茶敍時Cathy又畀人問起呢件事，佢話早前程少泉喺聲明中，已講咗係因為個人理由辭職，Cathy一再否認坊間傳聞：「程少泉同民政事務局嘅辦公室都唔喺同一座，我哋見面唔多過幾個鐘！」佢話大家見面都係交代吓工作，仲有其他同事在場喎。不過話時話，大家有意見、有乜摩擦，分分鐘都可以發生，更何況係幾小時，而且依家科技咁發達，唔係下下要見面先會吵架嘅！