本文重點
港區人大代表雷添良（Tim）縱橫政經界多年，一般人只知道佢係四大會計師樓羅兵咸永道會計師事務所合夥人，甚少人留意到，佢家族背景殊不簡單。Tim雷阿爺係九巴創辦人之一，廣為人所熟悉嘅荔枝角雷生春大宅，就係佢嘅祖屋。早前政府宣布將有七十八年歷史嘅「雷生春」，活化成中醫藥保健中心，雷家只低調地捐贈，未有大鑼大鼓開記招宣布，貫徹家族一向嘅低調作風。
卓妮早兩日同Tim雷傾偈，講起佢童年生活，原來「雷生春」畀咗佢唔少快樂回憶。樓高四層嘅「雷生春」係由佢爺爺雷亮所建，除咗大宅底層供雷亮同鄉兄弟開設「雷生春」醫館及藥店，上面三層就係雷亮家庭成員嘅住所。
打波出街 工人侍候
Tim雷一出世就喺度住，住到六歲至搬走。小時候嘅佢名副其實係少爺仔一名，有工人輪流侍候不在話下，閒來喺偌大嘅「走馬騎樓」打羽毛球，打到飛咗個波出街時，大嗌一聲，就有工人飛身落街執波。呢段童年回憶認真有趣，難怪Tim雷講起「雷生春」，仍流露依依不捨嘅表情。
不過，卓妮對「雷生春」嘅花邊新聞更有興趣。自八十年代開始，「雷生春」地舖雖然繼續營業，但樓上住宅部分就長期荒廢，由於空置多年，不時傳出鬧鬼傳說，卓妮向Tim雷求證傳聞是否屬實，佢就不以為然話：「你哋講啫！」改頭換面嘅「雷生春」大宅將於2012年投入服務，唔知Tim雷到時會否重遊舊地呢？
講番Tim雷近況，原來佢啱啱同家人同遊東京及上海返港，帶一對仔女見吓大都市最新發展。佢話最難忘係登上中國目前第一高樓——上海環球金融中心，佢話由地面搭
上一百樓，需時只係五十六秒，好彩自己膽子夠大，一啲都冇腳軟喎。
卓妮