白鴿黨立法會議員黃成智今年四月畀本報踢爆，喺去年立法會選舉期間虛報職業為註冊社工後，佢當時話自己只係「大頭蝦」，仲專登開咗個記招表明會盡快向法院提出呈請尋求寬免。不過，事件過了兩個半月，我哋見佢遲遲都未有動靜，就喺上星期五打電話問佢到底幾時會入稟，佢當時含含糊糊咁話：「差唔多喇！」之後仲以「唔方便回應」為由，拒絕解釋咁遲唔呈請嘅原因。
不過，本報喺星期一出咗篇「虛報社工黃成智玩拖字訣」嘅報道，「提醒」黃議員仲未呈請之後，佢竟然喺前日鬼鬼祟祟走去法庭入稟，同之前大鑼大鼓叫記者去採訪佢到社工註冊處重新註冊嘅做法截然不同，莫非佢作賊心虛？
我哋尋日再次向佢查詢呈請嘅細節，佢只係話排緊期上庭，之後有關遲遲唔提出呈請嘅原因、入稟狀嘅內容等統統拒絕回應，擺到明避得就避。政界口痕友就話，黃成智喺宣傳單張自稱社工，法庭未必相信佢係唔小心而批准寬免，可能因為咁，佢惟有一拖再拖，等件事淡化後才向法庭提出呈請喎。實情係咪咁，就要問過佢至知喇！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |