政府尋日公布現年五十九歲嘅建築署署長余熾鏗，將於下月五日起開始退休前休假，署長一職由現任副署長劉賴筱韞接任。本來署長夠鐘退休，由署內唯一一名副署長頂上，喺政府嚟講係正常不過嘅安排，但今次就引起非議，原因唔係因為劉太唔夠班，而係因為佢現年已經五十八歲。由五十八歲接任五十九歲，升職做多一年零、個位都未坐暖又要退休，就算佢點叻都好，都好難喺任內有乜大建樹，對部門發展絕對唔係一件好事。政府亦好快要再頭痕多次，搵過另一個人接班。
今次已經唔係第一次出現同類事件，早前外號「黑英」嘅前天文台長林超英退休，新台長李本瀅亦係五十八歲。其實政府內部已有規定，唔會畀啲將於一年內退休嘅高官升職，以免影響部門運作，防範有人純粹為咗想整大舊退休金而升職。李本瀅同劉太嘅個案原則上冇違規，但就畀人打擦邊球或者趕尾班車嘅感覺。莫非政府高官真係咁唔夠人，搞到十個茶壺九個蓋？