梁智仁告知卓妮，當初之所以選讀骨科，原因好簡單，就係唔鍾意內科。梁智仁憶述，一九六○年入港大選科時，覺得內科一味食藥搞掂，缺乏研究樂趣，婦科又唔想讀喎，一時間都揸唔定主意，佢睇番當時醫學不斷進步，但骨科發展相對停滯不前，他預見骨科發展潛力大，所以就揀定做骨科醫生，一做就三十幾年，近年一於轉型，做咗公大校長。

陳智文陳智思唔同「姓」

至於泌尿科專家金刀梁點解做醫生，主要係父親薰陶，佢仲好幽默話：「唔係好難㗎咋，死咪書，死讀書就得嘞！」話晒醫生都係專才喎？金刀梁謙稱：「依家呢個時代唔同喇，講通才，瓣瓣都要掂，我呢類專才只識一瓣，Out㗎喇，都唔係咁本事啫！」

至於Bernard，卓妮喺上周見到佢同胞兄陳智文（Stephen）孖住出席銀聯信託十周年酒會，原來Stephen比Bernard年長十一年，但保養相當好，點睇都唔似大咁多。卓妮仲留意到Stephen個英文姓氏串法係「Tan」，而Bernard與父親陳有慶就用「Chan」，Bernard解釋，阿哥當年攞身份證明文件係用潮州話拼音登記，所以就用咗「Tan」嘞！

卓妮