肥亨在電台感性演繹，在港交所酒會上亦成為受歡迎嘅人物。肥亨笑笑口話，雖然自己個人感性，但向來「鐵漢眼淚不輕彈」，今次只係呢世仔第四次喊；即使當日離開政府，與眾多同事及傳媒好友道別，場面感人，但佢亦沒有流過一滴眼淚；今次正生事件實在令佢痛心，佢才不吐不快。卓妮問佢幾時跟教會探訪正生書院？肥亨就話：「依家咁多人關注，唔使我去啦！」

金勞詹籲居民支持

「金勞詹」詹培忠尋日都有去酒會捧場，佢亦睇唔過眼梅窩居民如此對待正生學生。金勞詹話：「小朋友行咗條歪路，改過自新行正路應該要支持；如果唔支持，小朋友無地方改過，就會到處繼續沉淪，威脅社會治安，不但對梅窩居民有影響，全港市民都有影響。」

正生書院風波之中，教育界張文光同樣着緊，佢在電台節目上回想九一年初初做立法會議員時，曾經面對東頭邨居民反對在邨內興建弱智人士宿舍，他因為支持而被居民封為「四大賤人」之一，但事過境遷，宿舍與居民和平共存。佢苦口婆心話，事件可引伸到正生書院，社會應要接納和包容，有教無類。