香港同台灣關係持續升溫，喺香港九龍廣華醫院出世、算盤打埋算係半個香港人嘅「小馬哥」馬英九，決定競選國民黨主席，一班住喺香港嘅小馬哥「粉絲」發起國民黨黨員聯署行動，隔岸支持小馬哥。國民黨黨員好少喺香港公開活動，今次搭單宣洩積壓已久嘅怨氣，埋怨台北總部唔重視香港嘅「分公司」，仲爆咗啲國民黨喺香港鮮為人知嘅活動情況添。
○五年成立嘅馬英九港澳地區後援會召集人戴卓賢，尋日向傳媒講解挺小馬哥簽名行動，提到香港國民黨黨員嘅情況，佢話本來國民黨喺香港有設立「黨工」，負責聯繫同統籌香港國民黨黨員工作，但隨着兩岸政治形勢變化，喺○六年三月，台北總部以資源問題為由，將黨工撤走，港澳黨員覺得唔受重視，開始出現憂鬱情緒，所以希望小馬哥當選之後，可以嚟香港行一轉，振奮一下港澳區黨員嘅士氣咁話。戴卓賢曾經做過中西區區議員，○七年競逐連任失敗，佢希望小馬哥上台後能重整香港支部旗鼓，呢份心情好易理解。