國際計劃兒童發展協會五十年前喺香港搞咗個國際培幼會，以助養形式幫助過一萬二千個香港兒童，被港人稱為「契爺會」，直至七三年經濟起飛先撤出香港，轉戰印尼。香港唔少成功人士都受過契爺會恩惠，好似立法會議員陳茂波（Paul）、名導演張堅庭都係受助人之一，消委會前總幹事陳黃穗大學一畢業就加入契爺會做社工。契爺會將重返香江，喺香港成立分會籌集經費，尋日仲出嚟介紹發展大計，請埋當年嘅受助人阿Paul同張導演分享經歷，卓妮都貢咗去。
陳茂波火海失禮物
阿Paul依家住喺跑馬地豪宅，但原來佢童年屋企好窮，四十八年前一家人從內地來港時住喺石硤尾木屋區，六歲嗰年契爺會幫佢搵到個做美軍中尉嘅養父，之後兩年佢養父每個月都寄錢畀佢幫補家計。佢話人生中第一隻手錶都係契爺送嘅，不過當年石硤尾大火，佢同屋企人好彩走得切執番條命，但隻手錶就被祝融奪去，呢件事令佢唔開心咗好耐。
張堅庭成功「尋親」
阿Paul依家有錢有地位，所以就用行動回饋返社會，早前同朋友夾錢搞基金，喺內地建學校，但起咗幾間後成效唔係幾好，決定將筆錢直接捐畀苗圃行動。
一九六五年，當年得九歲嘅張導演同屋企人住喺上海街一個九百呎嘅四房公寓，同屋租客多達三十五人，一屋人擠到好似罐頭沙甸魚咁。之後契爺會幫佢搵到助學金，佢養父母為佢提供學費及生活費，直到佢十五歲為止。佢笑言，如果當年唔係成日畀社工逼佢寫信畀助養人，佢都唔會有咁好文采可以做到導演。為咗報答助養人嘅「養育之恩」，張導演曾多次喺報章雜誌上撰文「尋親」，直至最近先知佢嘅助養人喺加拿大，所以佢計劃暑假帶埋仔仔飛去道謝。
卓妮