首歌確係幾過癮，不過提提大家，千祈咪對住救護員叔叔唱喎，因為佢哋冇錯係日日做到冇停手，之但係就冇食飯嘅時候。聽到呢首歌，隨時喊到收唔到聲呀。

呢嗱，話說消防處轄下有三個紀律部隊職系，分別係救護員、消防員以及控制組人員。真係同人唔同命，同遮唔同柄咯，原來消防員連續救火四個鐘，處方會好貼心咁派埋餐車出動，仲有後備人手接替埋手頭工作，等一班救火英雄開餐食飽飽。

好嘞，如果係救護員又點呢？做二奶仔淒涼咯，餐車？諗都唔好諗呀，連食飯時間都冇呀，不過，食幾包梳打餅頂吓肚都仲可以嘅。

據消防處救護員會主席屈奇安指出，《公務員事務規例》列明文職人員每連續工作七小時，部門要安排一小時畀佢哋食飯。雖然紀律部隊唔似文職咁有固定食飯時間，但救護員要十二個鐘直踩當值，按道理，應該有一個小時食飯至啱數。

最弊係依家白車召喚次數多到停不了，柯打一單跟住一單，救護員人手又非常唔夠，搞到佢哋食飯時間都冇得抖，咁大個男人，做嘅又係體力勞動工作，冇食飯實手軟腳軟啦！

唔係講笑，試過有個患糖尿病嘅救護員因為冇食飯，喺當值期間餓到頭暈眼花，嘩，容乜易搬搬吓將傷者撻落地，傷者更加傷之餘，救護員自己變埋傷者㗎？

所以據屈奇安講，有啲救護員頂唔順，索性匿喺救護車上甚至急症室偷偷食飯盒。唉，食到鬼鬼祟祟咁委屈，真係難為佢哋咯。

消防處救護員會曾向前任及現任公務員事務局局長王永平及俞宗怡反映，但問題仍未獲解決，冇飯食情況日趨惡化，決定喺本周五召開會員大會，商討入稟一事，擬要求法院澄清救護員嘅用膳權利。

講到尾，係人都知問題癥結在於救護員人手不足，其實救護員早喺九二年已經向部門攤牌，○四年仲有七百名救護員上街抗議，足足爭取咗成十七年，因乜解究特區政府仲唔去增聘人手呀？

除咗人手唔夠，救護設備同樣舊到冇譜，白車平均車齡超過八年，其中三分之二係「老爺車」，舊到幾乎可以放入博物館。唔怪之得三日唔埋兩日就聽到有白車因為機件故障跪低嘅新聞啦。喂！救護服務爭分奪秒，遲一分鐘都隨時死得人，到底仲要死幾多個人，政府先肯增加救護員人手同埋購買新白車呢？

政府話就話有大把財政儲備，衰在孤寒成性，應該使嘅錢唔使，唔應該使嘅就亂咁使，害到全港市民隨時失救！唔好話功夫茶靠嚇，成班高官因住有日自食其果，Call架白車遲半個鐘至到，救護員餓到手軟，到時睇睇邊個係Poor Guy吖！