香港各界文化促進會牽頭搞咗個大型展覽，中總、廣東社團總會、百仁基金同菁英會一大堆社團參與，請到唔少親中政商界人士捧場，酒會都算墟冚。咁嘅場面，梗係唔少得致辭環節啦，台上嘅人照稿讀，台下幾百個嘉賓繼續高談闊論，賓虛咁嘈。不過，身為主禮嘉賓嘅煲呔曾，竟然坐住都照瞓得着，政制及內地事務局局長「林D9」林瑞麟致辭講祖國奮鬥史，講咗五分鐘，佢幾乎釣魚釣足五分鐘。
話說文促會會長楊釗致過辭後，就輪到林D9致辭，林D9篇稿有幾頁紙厚，由四九年新中國誕生講起，都未講到改革開放推進「四化」，煲呔曾已經急住去搵周公傾偈，對眼皮不停垂吓、開吓，當林D9講到中華振興，香港點樣從ＣＥＰＡ搵機遇時，煲呔曾直頭進入深層睡眠狀態，整個「垂釣」過程足足維持四、五分鐘，達到旁若無人境界，厲害！
煲呔曾最近忙着搞抗疫，尋朝行政會議又討論問責團隊減薪，究竟佢係因為攰得滯瞓着，定係畀人稱ＭＰ３嘅林D9催眠入定，真係要問佢自己至知。