雖然做行政會議成員有好高嘅社會地位，但分分鐘要貼錢做。尋日港府宣布問責官員減薪之後，行政會議召集人梁振英（CY）宣布，十四位行會非官守議員亦都跟隨減薪百分之五點三八。不過CY猛呻，佢依家已經要貼錢做行會召集人。
CY話，其實佢哋非官守議員嗰份唔係叫做「薪酬」，應該叫做「酬金」至啱。事關佢哋做行會唔似得立法會議員咁，有實報實銷津貼用嚟開辦事處同請人。好似佢咁，CY請咗三個政務助理，個個年資有番咁上下，三個助理嘅人工加埋多過佢份糧，加上佢又要交稅，平時又要宴請吓啲外國領事，總之就同政府官員或者立法會議員唔同啦！
CY咁講，變相話畀人聽佢倒貼做行會。話時話，行政會議除咗要集體負責外，仲要保密，CY請助理幫手，會唔會唔小心洩露行會機密㗎？不過，問到點睇財爺鬍鬚曾公開話過，問責高官減人工對整體經濟幫助唔大嘅言論，CY竟然話聽唔到。咁又係，呢個問題應該留番鬍鬚曾自己去答！