新制服分冬、夏款式，夏天前線員工着polo恤，主管級則穿恤衫，全部以淺綠做底色，配以橙黃迷彩圖案；加上兩邊縫咗個袋嘅綠色便褲同啡色運動鞋，顏色鮮明，與大自然融為一體。不過，最貼心係前線員工Ｔ恤上設有高領，加埋條拉鏈，布料透氣透汗兼有驅蚊功能，再隨身攜帶小風褸，完全照顧到員工隨時「通山跑」，一時大汗疊細汗、一時又要遮風擋雨嘅需要。

阿Paul着咗件前線員工嘅制服，左擰擰右擰擰好貪靚，佢讚件衫好輕好似冇着，最欣賞件風褸，係旅行隨身裝備；佢話如果喺立法會都可以着就好囉；「三碌拎」高層即場應承送件畀佢，唔知阿Paul係咪着返立法會呢？昂坪360商業及業務發展總管邵信明話，○七年接管纜車公司時已想換新制服，但當時掛住搞番好形象，提升可靠同安全度，惟有唔諗住，今日終於可以換埋，全體近二百名員工下月三日就會換晒新制服，屆時希望市民眼前一亮！