政府擬立法嚴禁近岸地區抽水養魚，法例一旦通過，勢必對鯉魚門商戶造成沉重打擊。根據政府提供數字，鯉魚門商戶多達二十九戶，佢哋都係九龍東直選議員及相關功能組別嘅選民，難怪立法會飲食界代表張宇人（Tommy）、漁農界黃容根同幾位九東直選議員，包括李華明（Fred）、黃國健、陳鑑林同梁家傑，尋日晨早邀請政府高官去鯉魚門視察，畀機會一班商戶吐苦水，想用民眾壓力逼政府收回成命。
食物及環境衞生局可能早料到議員有此一着，尋日副局長梁卓偉帶隊，同政治助理陳智遠、旅遊事務專員方舜文等十幾個當局官員一齊「出巡」，Tommy見到咁大陣仗都話：「嘩，政府晒馬喎！」巡視期間，梁卓偉仲反客為主，向商戶提出三個解決方法，包括改用科學鹽水養魚、買水同商戶夾錢喺燈塔外起抽水系統。阿Fred當場將建議逐一推翻，佢話鯉魚門養嘅都係貴價海鮮，改用科學鹽一旦技術掌握唔好，好易搞到魚類大量死亡，但買水嘅運送過程麻煩，建抽水系統嘅經費更非商戶負擔得起，即係冇樣行得通。
Tommy即時加多句：「咁搞法，商戶實執得七七八八，到時可能要改賣鹹魚！」
阿Fred希望政府妥協。黃容根仲講笑話，如果梁卓偉唔應承，就將佢掟落海。議員軟硬兼施下，梁卓偉依然企硬，巡視完之後仲發新聞稿點出政府同鯉魚門商戶做嘅當地水質測試，顯示大腸桿菌超標，表明政府立場堅定要做嘢，睇怕議員今次要說服政府都唔係易事！