本文重點
3L尋日改名「經濟動力」，林健鋒以召集人身份同梁劉柔芬及梁君彥大鑼大鼓宣布開張，畀正生書院風波搞到進退兩難嘅鄉議局主席劉皇發，都以創會成員現身，但發叔切完燒豬後火速離開，沒出席三位核心與傳媒嘅飯局。話口未完，卓妮中午十二點幾喺香港會巧遇發叔同教育局局長孫明揚前後腳入去食飯，發叔起初否認同孫公撐枱腳，但最終不敵卓妮窮追猛打，笑呵呵承認。食飯都搞到咁神秘，唔通密斟點樣拆解正生書院呢個「炸彈」？
「正生」事件鬧到火紅火綠，發叔夾喺政府同鄉民中間左右做人難，依家就要睇佢點樣拆局。咁啱得咁蹺，發叔同鄉議局副主席張學明尋日中午前後腳入去香港會，十分鐘後，孫公單拖趕到，據聞三人會面傾足粒幾鐘。兩點左右，發叔同張學明一齊走，孫公刻意殿後。
正生事件「事緩則圓」
卓妮喺門外撞正發叔，佢笑騎騎認孫公請佢食飯，但就話餐飯約咗好耐，佢同孫公都係好朋友，敍吓舊咁啫。但正生書院係炙手可熱話題，孫公又主管教育，邊度有空置學校可以畀正生書院搬過去，有邊個熟悉得過孫公？所以若然話孫公同發叔冇傾過正生呢單嘢，卓妮都唔會信；至於具體傾過乜，等卓妮再去八吓。
學校停課 孫太忙湊孫
不過，發叔臨走前話，佢本住四字真言處理正生事件，就係「事緩則圓」，即係唔急得，慢慢嚟自然搵到完美解決方法。發叔身邊嘅張學明就皺晒眉，批評政府喺正生事件上，太遲通知鄉議局。政府又計錯數陷入四面楚歌，唔知主責嘅保安局局長李少光使唔使揹黑鍋呢？
發叔同張學明離開後，輪到孫公。問佢度到橋解決正生書院事件未？佢無奈話：「仲諗緊！」佢亦唔認與發叔食飯。尋日喺香港會出現，仲有孫太鍾小芬，佢中午一點現身，話唔係同孫公食飯，亦冇同三人一齊離開；但相比之下，孫太輕鬆得多，佢話忙緊湊孫，事關兩個孫仔停課後喺佢屋企度假，孫太充當老師，教孫仔玩益智遊戲打發時間喎。
卓妮