「經濟動力」由林健鋒做召集人，搵嚟劉皇發做顧問，打着「實幹為經濟」旗號，尋日張燈結綵切燒豬正式揭幕，身為核心之一嘅發叔要開行政會議，遲咗半粒鐘到，佢同「3L」嘅合作鬆緊度，可知一斑，睇嚟會徽得三條藍線、唔係四條，弦外之音都幾明顯。不過點都好，有個行會成員坐鎮，「經濟動力」號召力都大啲，梁君彥即場晒手瓜，展示政治實力，好似中環擦鞋匠李伯被食環署迫害事件，佢哋知道後，第一時間搵到食衞局高層陳情，前日食衞局搵局長政治助理陳智遠回覆話肯讓步，只要中西區區議會唔反對，當局都無問題，願意發小販牌照畀鞋匠。

強調互動 風格不同

「經濟動力」仲會跟發叔意思，向港府建議，假期嗰陣將市區去郊外交通費減三成，鼓勵市民郊遊，估計庫房半年少收區區十億元，但對新界本土經濟效益宏大；「經濟動力」咁強調同政府嘅互動關係，無非要喺立法會芸芸政黨中，突出「同政府有偈傾」嘅優勢。「3L」話，手握立法會四票，但唔會吓吓同政府討價還價，唔會拉隊上街，即係話，同近期轉走直選路線嘅自由黨風格不同，唔係直接競爭對手。

潛在對手 來勢洶洶

不過，政治係現實嘅，「經濟動力」啟動，象徵「3L」從此自立門戶，不過，佢哋同自由黨嘅轇轕仍然糾纏不清。尋日喺「經濟動力」現身嘅成員中，恒基地產執行董事孫國林、屯門區議員羅煌楓同酒店業嘅李漢城，都係前自由黨黨員，而工業總會下屆主席大熱孫啟烈，更加孭住現任自由黨黨員身份加盟，分別今年初及去年底退黨嘅孫國林同羅煌楓講到出口，話唔鍾意自由黨近期成日上街遊行，似乎有合力剃自由黨眼眉嘅意味。梁劉柔芬話，唔排除派人參選立法會及區議會，睇嚟自由黨未來喺功能組別又多個潛在對手。

自由黨主席劉健儀對「經濟動力」嘅挖角行動不以為然，話自由黨不准雙重黨籍，「經濟動力」唔係政黨，無牴觸，而且自由黨同「經濟動力」都係關注商界同中小企，日後唔排除有合作空間咁話。劉健儀答就答得幾得體，不過，政治始終殘酷，對手來勢洶洶，自由黨都唔能夠坐視不理。