有「理大秋官」之稱嘅理工大學校長唐偉章原來係名副其實嘅單車發燒友，佢喺美國讀書同教書嘅時候，就已經成日踩單車四圍去玩，不過因為香港嘅路面人多、車多兼空氣差，所以佢上任理大校長之後已經唔可以好似喺美國咁，成日以單車代步，加上上任之後工作忙碌，即使想去郊外踩吓單車都冇時間，惟有日日匿埋喺屋企踩健身單車。
暑假將至，唐校長已經計劃返美國度假，重拾單車郊遊嘅樂趣。縱貫加拿大同美國嘅洛磯山脈係單車發燒友聚腳勝地，加上大導演李安嘅《斷背山》喺呢度取景，所以吸引到唔少旅客慕名而來。唐校長曾經喺洛磯山脈附近嘅科羅拉多州州立大學任機械工程學系教授兼系主任四年，佢話當年都會不時去洛磯山踩單車，不過佢就好謙咁話，自己單車功力唔夠深厚，所以當人哋挑戰山脈時，佢就留喺山腳踩單車，悠悠閒欣賞沿途風光。踩單車嘅運動量大，唐校長細細個就已經好鍾意踩單車，難怪年過半百身材一啲都冇走樣！