新地老大郭炳湘舊年同兄弟發生內鬥後黯然退出權力核心，由主席轉為非執董，銜頭改變後，大少亦謝絕應酬，對上一次現身，係同郭老太喺倫敦結伴欣賞芭蕾舞，低調到極。近日大少終於靜極思動，上星期以團長身份，帶埋班商家佬北上重慶、上海等地考察覓商機，佢大讚上海有晒條件做國際金融中心，好快爬過香港頭都未定。唔通佢發現內地天大地大，不如轉移陣地打拚內地江山？
郭大少呢次係以世界華商聯合促進會重慶高層考察團團長身份，拉埋三十幾個政商名流北上，當中包括金融、地產、實業及專業界代表，世茂房地產主席許榮茂都係考察團榮譽團長之一。郭大少全程笑容滿面地穿梭賓客之間寒暄，表現投入，相比早前發生兄弟爭拗時愁眉不展、心事重重嘅樣，明顯心情靚番晒。
大少結束三日重慶之行後順便去埋上海考察，包括參觀當年佢以新地主席身份拍板，喺浦東陸家嘴興建嘅國金大廈，今日佢仲會馬不停蹄前往北京開會，傾乜生意就唔知嘞，睇嚟大少已重拾工作活力，對於仲有冇機會喺新地掌權，可能已經放開晒。